दिनेश केसी , अछाम
अछामका विभिन्न नदी गाड तथा खोलाहरूमा अनाधिकृत रूपमा माछा मार्दै आइरहेको गुनासो व्यापक भएको छ ।
कानुनविपरीत हुने यस्ता कार्यले जलचरसमेत नासिँदै गएका छन् ।
गाड तथा खाेलाहरूमा विद्युतीय उपकरणको प्रयोग गरेर जलचर संरक्षण ऐन विपरीत माछा मार्ने गरेको अछाम स्थित थुप्रै सराेकारवालाले गुनासो गर्ने गरेका छन् ।
परम्परागत शैलीबाट दमालो बुझ्ने,जाल हान्ने,सोलो थाप्ने, थेग्नेट हाल्ने विधिकाे झन्झटले यतिबेला अछाम स्थित थुप्रै नदी, गाढ तथा खोलाहरूमा जलचर प्राणी र पर्यावरणमै असर पुग्ने गरी गाढ,नदी र खाेलामा मा करेन्ट तथा विषादी प्रयोग गरेर माछा मार्ने काम व्यापक भइरहेको छ।
विद्युतीय उपकरण करेन्ट तथा विष प्रयोग गर्दा नदी गाढ र खोलामा भएका सबै जलचर प्राणीको अस्तित्व नै समाप्त हुने र पर्यावरणमा समेत असर पर्ने भएकाले यसको राेकथाम तथा न्यूनीकरणका लागि कुनै पनि सरोकारवाला निकायले ध्यान नदिएको देखिन्छ ।
करेन्ट र ब्लाष्टिङको प्रयोग गर्दा नदी तथा खोलामा भएका सबै किसिमका जलचरको अस्तित्व नै समाप्त हुने र पर्यवरणमा क्षति पुग्ने भएकाले सो कार्यमा रोक लगाउनु पर्ने अछामका वेद प्रकाश तिमिल्सेनाकाे जोडदार माग छ ।
विष, करेन्ट र ब्लाष्टिङको प्रयोग गर्दा खोलामा भएका सबै किसिमका जलचरको अस्तित्व नै समाप्त हुने र कतिपय अवस्थामा करेन्ट लाग्दा मान्छेको ज्यान नै जाने खतरा हुने भएकाले यस्ता अपराधिक क्रियाकलाप राेक्न सम्बन्धित स्थानीय तह तथा प्रशासनकाे सक्रियतामा कमि देखिएको उनले औँल्याएका छन् ।
स्थानीय खोलामा पाइने माछालाई जैविक विविधतामा असर नपुग्ने गरी उचित समयमा सही विधि अपनाएर मार्ने र आर्थिक आयआर्जनमा टेवा पुग्ने गरी जनचेतना अभिवृद्धिका कार्यक्रम सञ्चालन गर्नुपर्ने नेपाल पत्रकार महासंघ जिल्ला शाखा अछामका संस्थापक समेत रहेका तिमेलसेनाकाे माग छ ।
खोलामा करेन्ट, बम विस्फोट र विषादी प्रयोग गरेर माछा मार्नेलाई स्थानीय प्रशासनले कानुनको दायरामा ल्याउन सकेको छैन ।
खोलामा करेन्ट लगाएर माछा मार्नेले ब्याट्री पछाडि बोकेर खोलामा करेन्ट लगाउने गर्छन् । करेन्ट लगाएर मरेको माछा टिप्ने तीनदेखि चार जनाको समूह हुन्छ । यसकाे राेकथामका लागि नत प्रहरी प्रशासन छ, नत स्थानीय तहनै लागेको देखिन्छ ।
तपाईको कमेन्ट लेख्नुहोस्